హైదరాబాద్ రియల్ ఎస్టేట్ రంగంలో అతి పెద్ద మోసంగా నిలిచింది ఏలియన్స్ స్పేస్ స్టేషన్ ప్రాజెక్ట్‌. తెల్లాపూర్‌లో 2012లో లాంచ్ చేసిన ఈ ప్రాజెక్ట్‌ను లగ్జరీ హౌసింగ్‌గా 20 ఎకరాల్లో 10,000కు పైగా యూనిట్లతో భారీగా ప్రచారం చేశారు. అప్పట్లో పత్రికలు, టీవీలలో జోరుగా ప్రకటనలు ఇచ్చి, హై రైజ్ ఫ్లాట్ల కల చూపి వేగంగా అమ్మకాలు జరిపారు. 2017 డిసెంబర్‌లో ఫ్లాట్లు అప్పగిస్తామని హామీ ఇచ్చినా, 95 శాతం చెల్లించిన కొనుగోలుదారులకు ఇప్పటికీ ఇళ్లు అందలేదు.
కన్స్ట్రక్షన్‌ స్ట్రక్చరల్‌ ఫ్రేమ్‌ లెవల్‌ దాటకపోవడంతో, డబ్బులు చెల్లించిన కొనుగోలుదారులు రెంట్‌ చెల్లించుకుంటూ, బ్యాంకు లోన్‌ వడ్డీలు భరిస్తూ నష్టపోతున్నారు. రెరా ఈ ప్రాజెక్టులో మోసం జరిగిందని తేల్చి, డెవలపర్‌ కొనుగోలుదారులకు వడ్డీతో పాటు పరిహారం చెల్లించాలని ఆదేశించింది. 2015లో ఏలియన్స్ గ్రూప్‌ ఎండి హరి చల్లా అరెస్ట్ అయినప్పటికీ, ప్రాజెక్ట్‌లో ఎలాంటి పురోగతి జరగలేదు.
వేలాది కొనుగోలుదారులు రెరా ఆదేశాలు అమలు చేసి ఫ్లాట్లు అందిస్తారని ఆశగా ఎదురుచూస్తున్నారు. ఈ కేసు తెలంగాణ రియల్ ఎస్టేట్ రంగంలో పెట్టుబడిదారుల నమ్మకంపై తీవ్ర ప్రభావం చూపినదిగా భావిస్తున్నారు.
