నేషనల్ పేమెంట్స్ కార్పొరేషన్ ఆఫ్ ఇండియా (NPCI) దేశవ్యాప్తంగా యూపీఐ వ్యవస్థను మరింత సురక్షితంగా, అందరికీ సులభంగా మార్చే దిశగా కీలక నిర్ణయాన్ని పరిశీలిస్తోంది. ప్రస్తుతం యూపీఐ చెల్లింపులు చేసేందుకు వినియోగదారులు 4 నుండి 6 అంకెల పిన్‌ను ఎంటర్ చేయాల్సి వస్తోంది. ఈ పిన్ వినియోగదారుడి లావాదేవీలను భద్రంగా నిర్వహించడంలో ముఖ్యపాత్ర పోషిస్తుంది. అయితే కొన్ని సందర్భాల్లో — ముఖ్యంగా పెద్దల కోసం లేదా గ్రామీణ ప్రాంతాల్లో ఉన్న ప్రజలకు — ఈ పిన్ ఎంటర్ చేయడం కాస్త కష్టంగా మారుతోంది.
దీన్ని దృష్టిలో ఉంచుకొని, ఎన్‌పీసీఐ యూపీఐ లావాదేవీల కోసం బయోమెట్రిక్ ధృవీకరణ (ఫింగర్‌ప్రింట్‌) లేదా ఫేస్ ఐడీ ఆధారిత సాంకేతికతను ప్రవేశపెట్టే ఆలోచనలో ఉంది. దీనివల్ల వినియోగదారులు ఇకపై పిన్ టైప్ చేయకుండానే చెల్లింపులు పూర్తి చేయగలుగుతారు. ఈ విధానం ద్వారా మరింత వేగంగా, సులభంగా, మరియు సురక్షితంగా డిజిటల్ లావాదేవీలు జరగవచ్చని నిపుణులు అభిప్రాయపడుతున్నారు.
ఈ కొత్త విధానం అమలులోకి వస్తే — యూజర్ మొబైల్‌ లోని బయోమెట్రిక్ సెన్సార్ లేదా ఫేస్ రికగ్నిషన్ సిస్టమ్ ఆధారంగా ధృవీకరణ జరుగుతుంది. ఉదాహరణకు: ఫోన్లో ఫింగర్ ప్రింట్ సెన్సార్ ఉంటే, ఫింగర్ ప్రింట్ వేశాకే లావాదేవీ పూర్తి అవుతుంది. అదే విధంగా, ఫేస్ ఐడీ ఉన్న మొబైల్‌లలో ముఖాన్ని స్కాన్ చేయడం ద్వారా చెల్లింపు నెరవేరుతుంది.
ఇది ముఖ్యంగా వృద్ధులు, చదువు తక్కువగా ఉన్న వారు, లేదా పిన్ మర్చిపోతున్న వ్యక్తులకి చాలా ఉపయోగకరంగా మారుతుంది. అంతేకాకుండా, ఈ విధానం పాస్‌వర్డ్ లీక్ అయ్యే ప్రమాదాన్ని కూడా తగ్గిస్తుంది. పిన్ ను ఎవరైనా చూడగలగడం వల్ల రిస్క్ పెరుగుతుంది. కానీ బయోమెట్రిక్ లేదా ఫేస్ ఐడీ మిమ్మల్ని తప్ప వేరెవ్వరూ ఉపయోగించలేరు.
అయితే, ఇది ఇంకా పరిశీలన దశలో ఉంది. కేంద్ర ప్రభుత్వం దీనిపై తుది నిర్ణయం తీసుకోలేదు. ప్రైవసీ, డేటా భద్రత, మరియు టెక్నికల్ అవస్థలు వంటి విషయాలు పూర్తిగా అధ్యయనం చేసిన తర్వాతే ఈ విధానం అమలులోకి వచ్చే అవకాశం ఉంది
