మలేషియాలో ఫ్లూ వ్యాధి వేగంగా విస్తరిస్తోంది. ఇప్పటికే 6,000 మందికి పైగా విద్యార్థులు ఇన్ఫ్లుఎంజా బారినపడడంతో పలు స్కూళ్లు తాత్కాలికంగా మూసివేశారు. ముఖ్యంగా పరీక్షల సీజన్ సమీపిస్తున్న ఈ సమయంలో వ్యాప్తి పెరగడంతో పేరెంట్స్, విద్యార్థుల్లో ఆందోళన నెలకొంది.
ఆరోగ్య మంత్రిత్వ శాఖ దేశవ్యాప్తంగా 97 ఇన్ఫ్లుఎంజా క్లస్టర్‌లను గుర్తించింది. గత వారం ఇవి కేవలం 14 మాత్రమే ఉండగా, ఇప్పుడు పెరుగుదల వేగంగా కొనసాగుతోంది. సోకిన వారిలో ఎక్కువ మంది స్కూల్, కిండర్‌గార్టెన్ విద్యార్థులే ఉన్నారు.
🏫 తరగతి గదుల్లో ఫ్లూ వ్యాప్తి ఆందోళన
సెలాంగోర్, పెనాంగ్ వంటి రాష్ట్రాల్లో విద్యార్థులు జ్వరం, గొంతు నొప్పి, అలసట వంటి ఇన్ఫ్లుఎంజా A, B లక్షణాలతో బాధపడుతున్నారు. వ్యాప్తి వేగంగా ఉండటంతో స్థానిక అధికారులు స్కూళ్లు మూసివేయాలని, సోకిన విద్యార్థులు 5–7 రోజుల సెల్ఫ్ క్వారంటైన్‌లో ఉండాలని సూచించారు.
ఆరోగ్య బృందాలు శానిటైజేషన్ డ్రైవ్‌లు నిర్వహిస్తూ, పాత కోవిడ్ కాలంలా మాస్కులు ధరించడం, గుంపులు నివారించడం వంటి సూచనలు మళ్లీ గుర్తుచేస్తున్నాయి.
📚 పరీక్షల టైమ్‌లో పెద్ద చిక్కు
నవంబర్ మొదటి వారంలో దాదాపు 4 లక్షల మంది విద్యార్థులు యూనివర్సిటీ ఎంట్రన్స్ పరీక్షలు రాయాల్సి ఉంది. ఈ సమయంలో ఫ్లూ వ్యాప్తి తీవ్రంగా ఉండటంతో, అధికారులు ఆరోగ్య రక్షణతో పాటు పరీక్షల నిర్వహణను సమన్వయం చేయడానికి ప్రత్యేక ప్రణాళికలు సిద్ధం చేస్తున్నారు.
🧬 కొత్త కోవిడ్ వేరియంట్ XFG భయం
ఫ్లూతో పాటు మలేషియా శాస్త్రవేత్తలను కొత్త కోవిడ్ వేరియంట్ “XFG” కూడా ఆందోళనకు గురి చేస్తోంది. ఇది మొదట భారతదేశంలో గుర్తించబడిన వేరియంట్, ప్రస్తుతం మలేషియాలో మొత్తం కోవిడ్ కేసుల్లో 8% వరకు ఈ వేరియంట్‌దే. వేగంగా వ్యాపించే లక్షణం ఉండటంతో అధికారులు అప్రమత్తమయ్యారు.
🚨 నిఘా పెంచిన ప్రభుత్వం
డైరెక్టర్ జనరల్ ఆఫ్ హెల్త్ మొహమ్మద్ అజామ్ అహ్మద్ మాట్లాడుతూ –
“కొత్త వేరియంట్‌లను ట్రాక్ చేయడానికి జన్యు నిఘా పెంచాం. సరైన వెంటిలేషన్, వ్యక్తిగత శుభ్రత పాటిస్తేనే ఇన్ఫ్లుఎంజా, కోవిడ్ రెండింటినీ అరికట్టవచ్చు” అన్నారు.
గత సంవత్సరం తో పోలిస్తే కోవిడ్ కేసులు 50% తగ్గినప్పటికీ, ఆరోగ్య సంస్థలు ఎటువంటి రిస్క్ తీసుకోవడం లేదని ఆయన తెలిపారు.
