డిప్యూటీ ముఖ్యమంత్రి పవన్‌ కళ్యాణ్‌ జిల్లాల పర్యటనకు సిద్ధమవుతున్నారు. రాష్ట్రవ్యాప్తంగా పర్యటన షెడ్యూల్‌ సిద్ధం చేయడం ప్రారంభించిన ఉపముఖ్యమంత్రి కార్యాలయం, మొదటి దశలో పార్వతీపురం మన్యం జిల్లాను ఎంపిక చేసినట్లు సమాచారం.
ఈ పర్యటనలో పవన్‌ కళ్యాణ్‌ కురుపాం ప్రాంతాన్ని సందర్శించనున్నారు. ఇటీవల అస్వస్థతకు గురైన విద్యార్థులు ఉన్న గురుకుల పాఠశాల పరిస్థితులను ప్రత్యక్షంగా పరిశీలించేందుకు ఆయన వెళ్లనున్నారు.
స్థానిక ప్రజా ప్రతినిధులు, అధికారులు, పార్టీ నాయకులతో సమావేశమై విద్యా సంస్థల్లో పరిస్థితులను సమీక్షించనున్నారు. విద్యార్థుల ఆరోగ్య పరిస్థితిపై, ఆహార నాణ్యతపై పవన్‌ కళ్యాణ్‌ సమగ్ర నివేదిక కోరే అవకాశం ఉంది.
జిల్లా పర్యటనల ద్వారా ప్రజా సమస్యలను ప్రత్యక్షంగా తెలుసుకుని తక్షణ చర్యలు తీసుకోవడమే ఈ పర్యటనల ప్రధాన ఉద్దేశ్యమని ఉపముఖ్యమంత్రి కార్యాలయం తెలిపింది.
