అబ్దుల్ కలాం ఆకాంక్షించిన రీతిలో పంచాయతీలు – పరిపాలనా సంస్కరణలకు మంత్రివర్గం ఆమోదం
రాష్ట్రంలోని గ్రామ పంచాయతీల పరిపాలనా వ్యవస్థలో పెద్ద ఎత్తున సంస్కరణలకు రాష్ట్ర మంత్రివర్గం గ్రీన్‌సిగ్నల్ ఇచ్చింది. గౌరవ ముఖ్యమంత్రి శ్రీ నారా చంద్రబాబు నాయుడు గారి నేతృత్వంలో శుక్రవారం జరిగిన మంత్రివర్గ సమావేశంలో ఈ నిర్ణయాలకు ఆమోదం లభించింది. ఉప ముఖ్యమంత్రి, పంచాయతీరాజ్ మరియు గ్రామీణాభివృద్ధి శాఖ మంత్రి శ్రీ పవన్ కళ్యాణ్ గారు ప్రత్యేక చొరవ తీసుకుని ఈ సంస్కరణలకు రూపకల్పన చేశారు.
మాజీ రాష్ట్రపతి డా. ఏపీజే అబ్దుల్ కలాం ఆకాంక్షించిన విధంగా పల్లెల్లో మౌలిక సదుపాయాలు, సమర్థవంతమైన పరిపాలన అందించాలనే లక్ష్యంతో పంచాయతీరాజ్ వ్యవస్థను పునర్వ్యవస్థీకరించనున్నారు.
🔹 ప్రధాన నిర్ణయాలు
- పంచాయతీల్లో అమలులో ఉన్న క్లస్టర్ వ్యవస్థను రద్దు చేశారు.
- మొత్తం 13,351 గ్రామ పంచాయతీలను స్వతంత్ర పరిపాలనా యూనిట్లుగా పరిగణించనున్నారు.
- 10,000 మందికి పైగా జనాభా ఉన్న పంచాయతీలను “రూర్బన్ పంచాయతీలు”గా గుర్తిస్తారు.
- వీటిలో పట్టణ స్థాయి మౌలిక సదుపాయాలు, సిబ్బంది, సేవలను అందుబాటులోకి తెస్తారు.
- పంచాయతీలను నాలుగు గ్రేడ్లుగా పునర్వర్గీకరణ చేయనున్నారు.
- **గ్రామ కార్యదర్శి పేరు పంచాయతీ అభివృద్ధి అధికారి (PDO)**గా మారుస్తారు.
- పంచాయతీరాజ్ శాఖలో ప్రత్యేక ఐటీ విభాగం ఏర్పాటు చేస్తారు.
🔹 రూర్బన్ పంచాయతీలలో పట్టణ తరహా పరిపాలన
మొత్తం 359 పంచాయతీలను రూర్బన్ పంచాయతీలుగా గుర్తించారు. వీటిలో పట్టణాల మాదిరి ప్లానింగ్, పారిశుధ్యం, తాగునీటి సరఫరా, ఆఫీస్ సిబ్బంది విభాగాలు ఏర్పాటు కానున్నాయి. రూర్బన్ పంచాయతీలలో సిబ్బంది వేతన శ్రేణి పెంపుతోపాటు ప్రమోషన్లకు అవకాశం కల్పించనున్నారు.
గ్రేడ్ 1 పంచాయతీలలో ఉన్న కార్యదర్శులకు డిప్యూటీ ఎంపీడీఓ కేడర్ పదోన్నతి, అలాగే జూనియర్ అసిస్టెంట్లకు సీనియర్ అసిస్టెంట్ పదోన్నతి లభించనుంది.
🔹 ఇంటర్ కేడర్ ప్రమోషన్లకు అవకాశం
మినిస్టీరియల్ మరియు ఫీల్డ్ పోస్టుల మధ్య ఇంటర్ కేడర్ ప్రమోషన్లకు మంత్రివర్గం ఆమోదం తెలిపింది. సిబ్బందికి రెండు వారాల శిక్షణ, ఆపై ఏడాది పాటు ఆన్‌జాబ్ శిక్షణ ఇవ్వనున్నారు.
🔹 ఐటీ ఆధారిత పంచాయతీరాజ్ పరిపాలన
గ్రామ పంచాయతీల రికార్డులు, పరిపాలన కార్యకలాపాలను ఆన్‌లైన్ పద్ధతిలో పర్యవేక్షించేందుకు ఐటీ విభాగం ఏర్పాటు చేస్తారు. దీనిలో డిజిటల్ అసిస్టెంట్ల సేవలను వినియోగిస్తారు.
🔹 పవన్ కళ్యాణ్ చొరవతో నూతన రూపకల్పన
నాలుగు నెలలపాటు నిపుణులు, ఉన్నతాధికారులతో చర్చల అనంతరం పవన్ కళ్యాణ్ గారు ఈ సంస్కరణలకు రూపకల్పన చేశారు. ఆయన దృష్టిలో పారదర్శకత, బాధ్యత, ప్రజా సేవల సమర్థవంతత ప్రధాన లక్ష్యాలుగా ఉన్నాయి.
