ప్రభుత్వ పాలనలో పారదర్శకత పెరిగినప్పుడే మంచి ఫలితాలు వస్తాయని తరచూ చెప్పే డిప్యూటీ సీఎం పవన్ కళ్యాణ్ ను ఆదర్శంగా తీసుకున్నారు.... పశ్చిమగోదావరి జిల్లా పెనుమంట్ర మండలం పాలమూరుకు చెందిన యువత... స్థానిక గ్రామానికి చెందిన జనసేన నాయకులు తోరం దుర్గాప్రసాద్, తోరం వెంకన్న బాబు సారధ్యంలో శనివారం స్థానిక పంచాయతీ వద్ద జరిగిన గ్రామసభకు డిజిటల్ తరహాలో వీరు ఏర్పాటు చేశారు. ఉపాధి,  వ్యక్తిగత పనులు రీత్య పొరుగు ప్రాంతాలు వెళ్ళినప్పటికీ సమస్యలను గ్రామసభ దృష్టి కి తీసుకొచ్చేలా గూగుల్ మీట్ ద్వారా అవకాశం కల్పించారు. కూటమి ప్రభుత్వం అధికారం చేపట్టిన తర్వాత గ్రామ పరిధిలో జరిగిన అభివృద్ధి పనులను డిజిటల్ తెరపై ప్రదర్శించారు. గ్రామ సర్పంచ్ కాకర రాజేశ్వరరావు అధ్యక్షతన జరిగిన ఈ సభలో ఎక్కువ మంది విద్యుత్ సమస్యను లేవనెత్తారు. లోవోల్టేజ్, విద్యుత్ కోతలు, స్థానిక సిబ్బంది అందుబాటులో ఉండకపోవడం వంటి సమస్యలపై మండిపడ్డారు.ఆయా  శాఖల ఉద్యోగులు వారి పరిధిలో జరుగుతున్న కార్యక్రమాల సమాచారాన్ని సభ దృష్టికి తీసుకువచ్చారు. సమస్యలను నమోదు చేసుకున్న కార్యదర్శి సత్యనారాయణ వాటి పరిష్కారానికి తగు చర్యలు తీసుకుంటామని హామీ ఇచ్చారు. వినూత్నంగా డిజిటల్ విధానంలో జరిగిన ఈ సభపై గ్రామంలో సర్వత్ర హర్షం వ్యక్తం అయింది.